حياك الله في مساحتي الإبداعية، وأتمنى أنك تحقق الاستفادة المرجوة من هذا المقال الخفيف
أنا أخوك عبدالرحمن مجدي وراح اتكلم معك عن آلية تسعير مختلفة عن الآلية المبنية على التكلفة اللي كلنا نعرفها
أول شيء خلونا نتفق على نقطتين قبل لا نبدء
دايم يقولون لولا اختلاف الأذواق لبارت السلع
وهذا يدخلنا على نقطة مهمة جداً، وهي أن اختلاف السلع وجودتها ومستوياتها مهم جداً في الأسواق.
النقطة الثانية: العميل يشتري القيمة، والقيمة تشمل شغلات كثيرة منها مستوى الجودة المقدمة منها الضمانات منها متى بستلم المنتج/الخدمة كذلك منها الخبرة كل هذا على سبيل المثال لا الحصر.
طيب الآن عرفنا أن فيه اختلاف في السوق وهذا الاختلاف صحي وإيجابي ومفيد للسوق ولصاحب المشروع
وعرفنا أن العميل يشتري القيمة في المقام الأول.
نجي للنقطة اللي بعدها وهي كيف أسعار السوق بشكل عام في نفس المنتج أو الخدمة؟
مايفرق إذا نفس الجودة أو لا، راح أتكلم عن الجودة بعد شوي.
لنفترض الأسعار بين 150 و 300 ريال، يعني أقل واحد يبيع ب 150 ريال وأعلى واحد في السوق يبيع ب 300 ريال نفس اللي أبيعه بغض النظر عن مستوى الجودة.
وبالتالي كذا حددنا سعر السوق.
إذا محتاج تعرف سعر السوق استعن بالله ثم بقوقل وبالبحث عن المنافسين وشد حيلك في الموضوع هذا لأنه جداً مهم وراح يأثر على كثير من قرارتك.
داري أنك قاعد تقول طيب والجودة؟
الجودة عامل جداً مهم بس قبل لا أحدد جودة الشيء اللي قاعد أبيعه بحدد جودة المنافسين في السوق نفسه
نقسم اللي يبيعون ب 150 إلى 300 حسب الجودة
المستوى الأعلى وهذولي اللي يبيعون بين 250 إلى 300 ريال للمنتج أو الخدمة اللي عندك
المستوى الوسط في السوق اللي يبيعون بين 200 إلى 250 ريال
وطبعاً المستوى الأقل وهم اللي بين 150 إلى 200 ريال
الحين عليك أنت تحدد وين مستوى الجودة اللي تقدمها؟ هل هي في الأعلى أم في الوسط ولا أقل شيء
وعلى فكرة ترى عادي جداً أقدم أقل جودة أو أعلى جودة أو بينهم ما راح يعيبك شيء لذلك في بداية المقال ذكرت لك أن الاختلاف في السوق مهم وإيجابي
فيه عملاء تدور الرخيص يقولك مد رجولك على قد لحافك وغيرهم اللي يدور الوسط وتراهم كثيرين، وفيه اللي يدورون الجودة العالية بأي ثمن
بس مهم جددداً تعرف مستوى خدمتك زين عشان ماتنصدم بالسوق، يعني ما يصلح تقدم جودة منخفضة وتبيعها بسعر عالي أو جودة عالية وتبيعها بسعر منخفض.
مايصلح ليش؟ لانك لو بعت جودة منخفضة بسعر عالي راح تخلق أعداء بدل من عملاء ولو بعت جودة عالية بسعر منخفض راح تخسر ومابتقدر تستمر.
وبس كذا خلاص عرفت متوسط سعر السوق وعرفت كيف بتسعر بناءً على جودة عملك.
ترى فيه طرق ثانية، بس هذه الطريقة لو بأسعر منتج أو خدمة أصلاً موجودة في السوق.
وإذا وصلت إلى هنا فأنا سعيد جداً أنك قرأت المقال للنهاية، إذا عندك أي ملاحظات أو حاب نتواصل أنتظرك بكل حماس على وسائل التواصل أعلى الموقع وحياك الله أي وقت.
طيب لو جاء أحد وقال أنا ياعبدالرحمن عندي منتج/خدمة مالها منافس في السوق ومحد قد جابها ولا قد سعروها قبلي
أقولك أبد حياك الله احجز معي استشارة ندرس فيها المنتج وبأساعدك على أكثر من طريقة في التسعير بإذن الله.
